Թուրքիայում բողոքի ցույցեր են, կա 70 ձերբակալված

Հասարակական07:48, 28 Դեկտեմբեր 2013

Թուրքիայում բողոքի ցույցեր են, կա 70 ձերբակալված

Դեկտեմբերի 17-ին Թուրքիայում կոռուպցիայի և ֆինանսական զեղծարարության բացահայտման ուղղությամբ իրականացված ոստիկանական խոշոր օպերացիան, որի ժամանակ ձերբակալվել էին նախարարների ու գործարարների որդիներ, հանրության մեջ բորբոքել է հակակառավարական տրամադրություններ: Թուրքական «Հաբերլեր» կայքի բնորոշմամբ` հանրային դժգոհության ալիքը « գահավիժող ձնագնդի պես մեծանում է»:

Նախօրեի երեկոյան մի խումբ ցուցարարներ փորձել են բողոքի քայլերթով շարժվել դեպի Ստամբուլի կենտրոնական Թաքսիմ հրապարակ: Ոստիկանները միջամտել են` կանխելու ցուցարարների ակցիան: Միջամտությունը վերածվել է բախումների: Ցուցարարների ոի ստիկանների միջև բախումներ են եղել նաև Անկարայի Քենեդի փողոցում: Արդեն հայտարարվել է ցուցարարներից 70 հոգու ձերբակալության մասին:

Երկրում բռնկված կոռուպցիոն սկանդալի հետևանքով բազմաթիվ բողոքի ակցիաներ են տեղի ունենում նաև Ադանայում, Իզմիրում, Մերսինում, Էսքիշեհիրում, Քոջաելիում և այլ բնակավայրերում: Ցուցարարները պահանջում են կառավարության հրաժարականը:

Հիշեցնենք, որ կոռուպցիոն սկանդալի մեջ շրջանառվում է նաև վարչապետ Ռեջեփ Էրդողանի որդու անունը: Դատարանը արդեն ծանուցագիր է ուղարկել նրան հունվարի 2-ին ներկայանալու և ցուցմունք տալու: Բայց խոսակցություններ կան, թե վարչապետի որդին, իմանալով վերահաս վտանգի մասին, վաղօրոք լքել է Թուրքիան և այժմ գտնվում է Ադրբեջանում:

Ermenihaber.am