Էրթուղրուլ Քյուրքչյու. «Թուրքիայում ամենքն էլ պետք է տեր լինեն իրենց ազգային ինքնությանը»

Հասարակական10:46, 20 Հունվար 2014

Էրթուղրուլ Քյուրքչյու. «Թուրքիայում ամենքն էլ պետք է տեր լինեն իրենց ազգային ինքնությանը»

Թուրքիայում սպասվող տեղական ինքնակառավարման մարմինների ընտրություններում առաջադրված Հաթայի քաղաքապետի թեկնածու, «Ժողովրդի դեմոկրատիա» կուսակցության (ԺԴԿ-HDP) համանախագահ Էրթուղրուլ Քյուրքչյուն Իսքենդերունում հանդիպել է քաղաքացիների հետ: Նա ընտրողներին հավաստիացրել է, թե ամեն գնով պայքարելու են, որպեսզի Թուրքիայում ազատություն լինի:

«Հասնելու ենք այն բանին, որ ամեն մեկը հպարտորեն ապրի, չվախենա իր կրոնական պատկանելության համար, ազատորեն ապրի: Ինչ գնով էլ լինի, մենք պայքարելու ենք այդ բաղձալի ազատությանը հասնելու համար: Նոր հասարակարգ ենք ուզում, հետդարձի ճամփա չկա այլևս»,- ասել է քաղաքապետի թեկնածուն:

Նա նաև նշել է, որ իրենց նպատակն է Թուրքիայում անվտանգ դարձնել ազգային փոքրամասնությունների կեցությունը: Ըստ նրա` արաբին արաբ, թուրքին թուրք, քրդին քուրդ, հային հայ, չերքեզին չերքեզ պետք է ասել: Ամենքն էլ պետք է տեր լինեն իրենց ազգային ինքնությանը: Ժողովուրդները նախ պետք է հավասար դիտվեն հետո նոր եղբայր լինեն:

Ermenihaber.am