Ստամբուլի ոսկերիչների պալատի նախագահ է ընտրվել հայազգի Նորայր Իշլերը

Հասարակական09:16, 22 Հունվար 2014

Ստամբուլի ոսկերիչների պալատի նախագահ է ընտրվել հայազգի Նորայր Իշլերը

2014 թվականի հունվարի 16-ին տեղի են ունեցել Ստամբուլի ոսկերիչների պալատի նախագահի ընտրությունները:
Ընտրություններում հաղթել է ZELA-ի տնօրեն հայազգի Նորայր (Համբարձումյանը) Իշլերը: Նա հավաքել է 358 ձայն՝ 58 ձայնով հետ թողնելով իր հիմնական մրցակցին:

Թուրքական «T24» լրատվական կայքի հայազգի հոդվածագիր Րաֆֆի Հերմոնն անդրադարձել է թեմային:
Հոդվածագիրը Նորայր Իշլերին բնութագրել է որպես ազնիվ, հավասարակշռված, ինքնավստահ, խարիզմատիկ անձնավորություն:
Հեղինակը նշում է, որ այս ընտրությունը բոլոր առումներով՝ թե՛ նախընտրական, թե՛ հետընտրական, ժողովրդավարություն վառ օրինակ է:
Սակայն Րաֆֆի Հերմոնը հոդվածում ուշագրավ զուգահեռներ է անցկացրել՝ մի կողմից հիշեցնելով հայերի նկատմամբ անարդարությունները (Ստամբուլում հայ ծեր կանանց վրա իրականացված հարձակումները, Հրանտ Դինքի սպանության գործով դատավարությունը, որը մեղավորների չբացահայտելու համար պետության արածները թաքցվում են, ապացույցները՝ վերացվում, Հայոց ցեղասպանության հիշատակի օրը ազգությամբ հայ ժամկետային զինծառայող Սևակ Բալըքչըի սպանությունը), իսկ մյուս կողմից մատնանշելով «Դրամատուրգների միության» նախագահի պաշտոնում գրող Ալին Թաշչյանի ընտրվելու, Ստամբուլի ոսկերիչների պալատի նախագահի ընտրություններում Նորայր Իշլերի հաղթանակի օրինակները:

Հոդվածագիրը նշում է, որ բոլոր վատ երևույթները ահեղ դատաստանի նախորդող շրջան է հիշեցնում:

Նա համոզված է, որ ահեղ դատաստանից խուսափելու միայն մեկ ճանապարհ կա: Այն է՝ պետք է թույնը հակաթույնով փոխարինել և կրակի վրա բենզինի փոխարեն ջուր լցնել: