Թուրք հոդվածագիր. «Աբդուլլահ Օջալանի իրական անունը Արթին Հակոբյան է»

Հասարակական13:35, 31 Հունվար 2014

Թուրք հոդվածագիր. «Աբդուլլահ Օջալանի իրական անունը Արթին Հակոբյան է»

Քրդերի առաջնորդ, «Քուրդիստանի բանվորական կուսակցության» (ՔԲԿ-PKK) հիմնադիր, այժմ Թուրքիայի Իմրալը կղզում ցմահ ազատազրկման դատապարտված Աբդուլլահ Օջալանին թուրքերը բազմիցս վերագրել են հայկական ծագում, իսկ Թուրքիայի դեմ տասնամյակներ շարունակ անջատողական պայքար մղող ՔԲԿ-ը` հայկական նախագիծ:

Նման բնույթի հերթական հրապարակմանը հանդիպում ենք ամերիկաբնակ թուրքերի «turknorthamerica.com» լրատվական կայքում: Հոդվածի հեղինակ Արմաղան Յըլմազը, Օջալանին ահաբեկիչ անվանելով, քննության է առնում վերջինիս էթնիկ ծագումը: Յըլմազը չի ստույգ հիմնավորում կամ փաստարկում Օջալանի հայկական ծագման մասին տեղեկությունը, բավարարվում է միայն հետևյալ անորոշ հղումով` «մի շարք աղբյուրներ»:

Ավելին` հոդվածագիրն ափսոսանք է հայտնում, որ Թուրքիայի կառավարությունն ու զանգվածային լրատվամիջոցները խորամուխ չեն լինում Օջալանի հայկական ծագման խնդրի մեջ: Նա ուշադրություն է հրավիրում Օջալանի կենսագրության վրա:

«Օջալանի հայրը հայկական ծագում ունի: Ընտանիքն Ամարա (Օմերլի) գյուղից է, որը հայկական հնագույն բնակավայր է: 1915-ից հետո բնակեցվել է քրդերով: Աբդուլլահ Օջալանին ընտանիքում անվանում էին Արթին, ազգանունն էլ` Հակոբյան»:

Յըլմազը հիշատակում է Թուրքիայի պատմագիտական ընկերության նախկին նախագահ և «Ազգայնական շարժում կուսակցության» (ԱԶԿ-MHP) ներկա պատգամավոր Յուսուֆ Հալաչօղլուի մասին, ով տարիներ առաջ հայտարարում էր, թե քրդական «Խաղաղություն և ժողովրդավարություն» կուսակցության մեջ բազմաթիվ հայեր կան:

Յըլմազը նշում է, որ Օջալանի հայկական ծագման մասին լուրերը նոր չեն և վաղուց են շրջանառվում: Սակայն առ այսօր ոչ պետության ոչ էլ թեմային առնչակից անձանց կողմից ոչ հերքվում է, ոչ էլ` հաստատվում:

Ermenihaber.am