Ստամբուլի հայկական հիվանդանոցին է վերադարձվել նախկինում խլված անշարժ գույքը

Հասարակական12:34, 07 Փետրվար 2014

Ստամբուլի հայկական հիվանդանոցին է վերադարձվել նախկինում խլված անշարժ գույքը

Թուրքիայի հայկական համայնքին է վերադարձվել Ստամբուլի Սուրբ Փրկիչ հիվանդանոցի հիմնադրամին պատկանող 49.259 քմ հողատարածքը, որի վրա այժմ գործում են մարզական հաստատություններ, շուկա և ավտոկայանատեղի: Ինչպես հայտնում է Ստամբուլում հրատարակվող երկլեզու «Ագոս» շաբաթաթերթը, Թուրքիայի կառավարության հիմնադրամների գլխավոր խորհրդի ընդունած որոշումից հետո նշյալ անշարժ գույքը գրանցվել է հայապատկան տարածք և տրվել` սեփականության համապատասխան վկայականով:

Սուրբ Փրկիչ հիվանդանոցի հիմնադրամի գործադիր խորհրդի նախագահ Պետրոս Շիրինօղլուն համայնքի անունից գոհունակություն է հայտնել, որ օրինականորեն տիրոջն է վերադարձվել հայապատկան անշարժ գույքը:

«Տարիների մեր պայքարը և երազանքը վերջապես դարձավ իրականություն: Այս ձեռքբերումը կարևոր է այն առումով, որ համայնքի ու հիմնադրամի վաղվա օրվան ավելի վստահ կարողանանք նայել»,- ասել է Շիրինօղլուն` շնորհակալություն հայտնելով թուրքական կառավարությանն ու մասնավորապես վարչապետ Ռեջեփ Թայիփ Էրդողանին:

Նշենք, որ վերադարձված այդ տարածքը նախկինում` 1964-ին, խլվել էր հայերից ու հանձնվել Ստամբուլի Զեյթինբուրնու և Բույուքշեհիր թաղապետարանների ենթակայությանը:

Թուրքական «Դեմոկրատ հաբեր» լրատվական կայքը նշյալ իրադարձությունը բնորոշել է հետևյալ կերպ. «Հայկական համայնքին է վերադարձվել ամենաթանկ անշարժ գույքը Հանրապետական Թուրքիայի ողջ պատմության ընթացքում»:

Ermenihaber.am