Հասան Ջեմալ. «Էրդողանը փորձում է կտրել համացանցի լեզուն»

Հասարակական09:41, 14 Փետրվար 2014

Հասան Ջեմալ. «Էրդողանը փորձում է կտրել համացանցի լեզուն»

Ջեմալ փաշայի թոռը՝ հայտնի թուրք լրագրող Հասան Ջեմալը, բացահայտել է թուրքական «Միլլիյեթ» թերթից դուրս գալու պատճառները:
Ջեմալը հայտնել է, որ ինքը հեռացել է այն բանից հետո, երբ վարչապետ Էրդողանը հեռախոսազրույց է ունեցել «Միլլիյեթ» թերթի ղեկավարի հետ:

Թուրքական «Հաբեր թուրք» հեռուստաալիքին հյուրընկալված լրագրողը նշել է, որ դեմ է ժողովրդավարական արժեքների, իրավունքի, ազատությունների մասին իր ընկալումներին հակառակ կիրառվող քայլերին:
«Վարչապետ Էրդողանը ժողովրդավարության և իրավական հարցերում ձեռնարկած քայլերով սպանում է ժողովրդավարությունը և իրավունքը», - ասել է Ջեմալը:

Ըստ Ջեմալի՝ Էրդողանի մեջ ժողովրդավարության հանդեպ վախ կա, որը գնալով խորանում է:

Լրագրողի խոսքերով Էրդողանի խորացող վախը զգացվում է բոլոր բնագավառնում՝ լրատվական դաշտում, իրավական հարթությունում, ժողովրդավարական իրավունքների հարցում: Իսկ այժմ էլ հերթը համացանցին է հասել: Վարչապետ Էրդողանը այդ վախի պատճառով այժմ համացանցի լեզուն է փորձում կտրել:

«Չեմ կարծում, որ մի վարչապետ, ով արհամարհում է դատական համակարգի ակնախությունը, ժողովրդավար, իրավական պետությունը, վերահսկում է լրատվական դաշտը, կտրում է համացանցի լեզուն, կարող է խաղաղության գործընթացում որևէ դրական բան անել»,- հավելել է Հասան Ջեմալը:

Հիշեցնենք, որ Հասան Ջեմալը 15 տարվա աշխատանքից հետո հեռացվել էր «Միլլիյեթից» 2013 թվականին: Դեռևս այն ժամանակ տեղեկություններ էին շրջանառվում, որ հեռացման պատճառը Ջեմալի հոդվածներն էին, որոնք դուր չէին եկել վարչապետ Էրդողանին:

Տեղեկացնենք, որ սա առաջին դեպքը չէ, որ Թուրքիայի վարչապետը խառնվում է լրատվամիջոցների գործերին: Վերջերս նման դեպքի մասին բացահայտել էր Թուրքիայի ընդդիմադիր «Ազգայանական շարժում» կուսակցության խորհրդարանական խմբակցության փոխնախագահ Յուսուֆ Հալաչօղլուն: Նա հայտարարել, թե վարչապետը պահանջել է գրաքննել իր կուսակցության նախագահ Դևլեթ Բահչելիի ելույթը՝ որպես ապացույց ներկայացնելով Էրդողանի հեռախոսազրույցի ձայնագրությունը: