Թուրքիայում Էլազիգի հայկական եկեղեցին օգտագործվում է որպես մեքենաների կայանատեղի

Հասարակական14:26, 03 Ապրիլ 2014

Թուրքիայում Էլազիգի հայկական եկեղեցին օգտագործվում է որպես մեքենաների կայանատեղի

Հայկական բողոքական եկեղեցին, որը 1973 թվականին Դիարբեքիրի մշակութային եւ բնական ժառանգության պահպանության վարչության կողմից ինչ-ինչ պատճառներով գրանցվել է որպես «Ասորական պատմական եկեղեցի» այսօր մասնավոր սեփականության կարգավիճակ ունի:

19-րդ դարավերջին կառուցված այս եկեղեցին Անատոլիայում քրիստոնյա բնակչության պակացելուց հետո (ցեղասպանությունից հետո-EH) առանց տերերի մնացած այլ եկեղեցիների նման երկար ժամանակ օգտագործվել է տարբեր նպատակներով: Հանրապետական Թուրքիայի ժամանակաշրջանում օգտագործվել է որպես ալյուրի ֆաբրիկա, այնուհետև լքվել է: Մի որոշ ժամանակ այստեղ է կազմակերպվել շաբաթական տոնավաճառը, այնուհետև օգտագործվել է, որպես ոչխարների գոմ:

Հայկական «Ակօս»-ի հաղորդմամբ՝ 2007-ին արված պաշտոնական հայտարարության համաձայն՝ եկեղեցին պետք է վերածվեր հիվանդանոցի՝ առանց ճարտարապետական տեսքը աղավաղման: Արդեն 7 տարի է անցել, սակայն որևէ միջոցառում այս ուղղությամբ չի ձեռնարկվել:

Եկեղեցու՝ Էլազիգի կենտրոնում գտնվելու պատճառով, այն դարձել է ամենապահանջված կայանտեղիներից մեկը: Ընդ որում մեքենաների կայանման համար օգտագործվում է ոչ միայն եկեղեցու շրջակայքը, այլև հենց շենքի ներսի մասը: Չափերով ավելի մեծ մեքենաներ էլ մտնել-դուրս գալուց վնասում են եկեղեցու մուտքի քարերը, ու չկա մեկը, որ նրանց զգուշացնի…