Անկարայում տեղացիների և սիրիացի փախստականների միջև բախում է տեղի ունեցել

Հասարակական09:19, 08 Մայիս 2014

Անկարայում տեղացիների և սիրիացի փախստականների միջև բախում է տեղի ունեցել

Անկարայի Ալթընդաղ թաղամասում տեղացիների և սիրիացի փախստականների միջև լարվածություն է ստեղծվել: Ըստ թուրքական «Հյուրիյեթ» թերթի` տեղեկություն է տարածվել այն մասին, թե իբր սիրիացիներից մեկը հարվածել է թաղամասի բնակիչներից մեկին, ինչից հետո տեղացիները փորձել են վրեժ լուծել սիրիացիներից:

Նրանք քարեր են շպրել այն շենքի վրա, որտեղ բնակվում են սիրիացի գաղթականները: Ավելի ուշ միջամտել է ոստիկանությունը և դժվարությամբ կարողացել է ցրել զայրացած ամբոխին, իսկ որոշ սիրիացիներ բերման են ենթարկվել:

Սակայն ոստիկանության հեռանալուց հետո թաղամասի բնակիչները նորից են հավաքվել և այս անգամ սիրիացիների շենքի վրա այրվող նյութեր են նետել, ինչի հետևանքով շենքի բնակարաններից մեկում հրդեհ է բռնկվել: Այնուհետև խոչընդոտել են հրդեհը հանգցնելու համար կանչված հրշեջներին` փակելով ճանապարհը ու փորձելով թույլ չտալ հանգցնել հրդեհը: Սակայն ոստիկանության օգնությամբ հրշեջները հասել են դեպքի վայր ու հանգցրել հրդեհը: Ըստ աղբյուրի` այս դեպքերի հետևանքով կան մեծ թվով վիրավորներ: Նրանց մի մասը տեղում է բուժօգնություն ստացել, մյուս մասն էլ տեղափոխվել հիվանդանոց: Դեպքի առնչությամբ տարվում է հետաքննություն:

Ermenihaber.am