Ածխահանքի զոհերի թիվը հասել է 232-ի. Ստամբուլում նստացույց է սկսվել

Հասարակական12:06, 14 Մայիս 2014

Ածխահանքի զոհերի թիվը հասել է 232-ի. Ստամբուլում նստացույց է սկսվել

Աղետի վայր մեկնած վարչապետ Ռեջեփ Թայիփ Էրդողանն անձամբ է պաշտոնապես հայտնել, որ վթարված ածխահանքից դուրս են բերվել տասնյակ նոր զոհերի դիեր և զոհերի թիվն արդեն հասել է 232-ի:

Նշենք, որ ավելի վաղ տեղեկացվել էր 205 զոհի ու 8 տասնյակ վիրավորների մասին: Արդեն հաստատվել է 124 զոհի ինքնությունը:

Թուրքիայի պետական լրատվական «Անադոլու» գործակալությունը հայտնում է, որ Սոմայի ածխահանքը գործարկող մասնավոր ընկերության` Ստամբուլի Լալե փողոցում գտնվող գրասենյակի առջև մի խումբ քաղաքացիներ անցել են նստացույցի: Ցուցարարները պարզել են սգո և բողոքի պաստառներ, իսկ գրասենյակի մուտքի դռանն ու արտաքին պատերին ներկանյութերով զանազան գրություններ թողել: Գրասենյակի շրջակայքում ոստիկանությունը խստացրել է անվտանգության միջոցառումները:

Հիշեցնենք, որ Թուրքիայի արևմտյան Մանիսա նահանգի Սոմա շրջանում գտնվող ածխահանքում նախնական տեղեկությունների համաձայն էլեկտրական խոտանից նախօրեին բռնկվել էր հրդեհ, ինչի հետևանքով խոշոր վթար էր տեղի ունեցել: Հանքում այդ պահին գտնվելիս է եղել 787 աշխատակից: Տեխնածին այդ աղետի կապակցությամբ Թուրքիայում հայտարարվել է եռօրյա սուգ:

Ermenihaber.am