Թուրքիայում 3-օրյա սուգ է. ածխահանքի զոհերի թիվը հասել է 282-ի

Հասարակական08:30, 14 Մայիս 2014

Թուրքիայում 3-օրյա սուգ է. ածխահանքի զոհերի թիվը հասել է 282-ի

Թուրքիայի Մանիսա նահանգի Սոմա ածխահանքում տեղի ունեցած խոշոր վթարի հետևանքով զոհված հանքագործների թիվը հասել է 282-ի: Ըստ թուրքական պետական «Անադոլու» լրատվական գործակալության` այդ մասին պաշտոնապես հայտնել է Թուրքիայի էներգետիկայի և բնական պաշարների նախարար Թաներ Յըլդըզը: Նշվում է, որ զոհերի թվում կան նաև ածխահանքի 15 և 18 տարեկան աշխատակիցներ և փրկարարներ: Կան նաև տասնյակ վիրավորներ: Աղետի վայրում հրդեհաշիջման ու փրկարարական աշխատանքներ է իրականացնում շուրջ 500 փրկարար:

Զոհերի մարմինները հուղարկավորության համար հանձնվում են նրանց ընտանիքներին: Վթարված ածխահանքում դեռ արգելափակված հանքագործներ կան: Զոհերի հարազատներին արդեն ցավակցական ուղերձ է հղել Թուրքիայի զինված ուժերի գլխավոր շտաբը:

Թուրքիայի էներգետիկայի և բնական պաշարների նախարարը տեղեկացրել է, որ երկրում հայտարարվում է եռօրյա սուգ` սկսյալ մայիսի 13-ից: Այդ օրերին Թուրքիայի պետական դրոշները կխոնարհվեն ինչպես երկրի ներսում, այնպես էլ արտերկրում: Թուրքիայի խորհրդարանը դադարեցրել է աշխատանքները` ի նշան սգո: Իսկ նախագահ Աբդուլլահ Գյուլը չեղյալ է հայտարարել Չինաստան կատարելիք իր այցը:

Ermenihaber.am