Թուրքիայի հայերի մի մասն աջակցություն է հայտնել նախագահի թեկնածու Դեմիրթաշին

Հասարակական12:39, 14 Հուլիս 2014

Թուրքիայի հայերի մի մասն աջակցություն է հայտնել նախագահի թեկնածու Դեմիրթաշին

Թուրքիայի հայերի «Նոր զարթոնք» քաղաքացիական շարժումն իր սատարումն է հայտնել առաջիկա նախագահական ընտրություններում որպես թեկնածու առաջադրված Սելահաթթին Դեմիրթաշին: Վերջինս առաջադրվել է ընդդիմադիր «Ժողովուրդների դեմոկրատական կուսակցության» (ԺԴԿ-HDP) կողմից: Ծագումով զազա քուրդ է:

Վերոնշյալ շարժման մեջ ընդգրկված են «Հայ մշակույթի և հանդուրժողականության» միությունն ու Նոր Ռադիոն: «Նոր զարթոնք» քաղաքացիական շարժումը, ըստ թուրքական «դեմոկրատ հաբեր» լրատվականի, տարածել է հայտարարություն, որի մեջ մասնավորապես ասված է.

«Ցեղասպանությունը ժխտողներին, գողերին, խաբեբաներին ձայն չկա: նախագահի մեր թեկնածուն Սելահաթթին Դեմիրթաշն է»:

Նախագահի թեկնածու Դեմիրթաշն էլ Ստամբուլում կրոնական փոքրամասնությունների ներկայացուցիչների հետ հանդիպման ժամանակ պատմել է, որ մանուկ հասակից ինքն ականատես է եղել Թուրքիայում դրսևորվող խտրականություններին: Նշել է, որ թուրքական պետությունը պետք է ներողություն խնդրի հայերից, հույներից ու հրեաներից:

«Ես մեծացել եմ հայկական թաղամասում: Ինչքան հասուն մարդ էի դառնում, այնքան լավ էի գիտակցում, թե ինչպես են հայերը ենթարկվում խտրականության»:

Ermenihaber.am