Թուրանիստները սպառնացել են Ցեղասպանության մասին ֆիլմ նկարահանած թուրք ռեժիսորին

Հասարակական11:18, 04 Օգոստոս 2014

Թուրանիստները սպառնացել են Ցեղասպանության մասին ֆիլմ նկարահանած թուրք ռեժիսորին

«Պանթյուրքիստ թուրանիստների միություն» կոչվող հայատյաց կազմակերպությանը պատկանող «Ötüken» ամսագրի թվիթերյան էջում սպառնալից գրառում է կատարվել` հասցեագրված հայկական «Ակոս» շաբաթաթերթի և թուրք ռեժիսոր Ֆաթիհ Աքընին:

Նշենք, որ վերջինս Հայոց ցեղասպանության մասին պատմող ֆիլմ է նկարահանել («Հատում»), իսկ «Ակոս»-ը լուսաբանել է այդ թեման: Ֆիլմը ներկայացնում է ցեղասպանության ժամանակ հրաշքով փրկված մի հայ մարդու պատմությունը, ով փնտրում է իր երկու աղջիկներին: Հարցազրույցի ժամանակ ռեժիսորը կարծիք էր հայտնել, որ Թուրքիայի հասարակությունը պատրաստ է դիտել նման ֆիլմ և հուսացել, որ ֆիլմը կցուցադրվի Թուրքիայում:

Այս ամենից հետո վերոնշյալ կազմակերպությունը սպառնացել է «Ակոս»-ին և թուրք ռեժիսորին:

«Այդ ֆիլմը չի ցուցադրվելու Թուրքիայի և ոչ մի կինոթատրոնում: Մենք` ճերմակ գլխարկավորներս հետևում ենք զարգացումներին: Դե փորձվեք»,- ասված է թվիթերյան գրառման մեջ: Թուրանիստները ռեժիսոր Աքընին մեղադրել են «Քուրդիստանի բանվորական կուսակցության» (ՔԲԿ-PKK) հետ մերձ կապերի մեջ:

Այս մասին տեղեկացնող թուրքական «Հաբերբանդ» կայքը հիշեցնում է, որ «Ակոս»-ի հիմնադիր խմբագրապետ Հրանտ Դինքին 2007-ի հունվարի 19-ին փողոցում հրազենով սպանած Օգյուն Սամասթը սպիտակ գլխարկ էր կրում գլխին: Թուրանիստներն իրենց գրառման մեջ նշելով «մենք` սպիտակ գլխարկավորներս» արտահայտությունը ակնհայտորեն ուղերձ են հղում Դինքի սպանությանը:

Ermenihaber.am