Թուրքական հեռուստաալիքի եթերում Ազնավուրի երգի հեռարձակումը զայրացրել է թուրք հեռուստադիտողներին

Հասարակական07:46, 09 Սեպտեմբեր 2014

Թուրքական հեռուստաալիքի եթերում Ազնավուրի երգի հեռարձակումը զայրացրել է թուրք հեռուստադիտողներին

Թուրքական «Հաբերթյուրք» հեռուսաալիքի եթերում հաղորդավար Մուրադ Բարդաքչըն պատմել է աշխարհահռչակ հայ շանսոնյե Շառլ Ազնավուրի մասին, այնուհետև հեռուստաալիքի եթերում ցուցադրվել է Ազնավուրի տեսահոլովակներից մեկը:

Տեսահոլովակի ցուցադրումից հետո հեռուսահաղորդման ինտերնետային էջում հաղորդավարի հասցեին վիրավորական մեկնաբանություններ են հնչել, թե ինչպես կարելի է եթերում հայ երգչի երգ հեռարձակել:

Ինչին ի պատասխան` Բարդաքչըն ասել է. «Հաջորդ շաբաթ ևս 2 հայերեն երգ կլինի եթերում: Որևէ երգչից կամ երգից վախենալը չի սազում Թուրքիային: Ի՞նչ է մի երգը կարող է երկի՞ր քանդել: Եթե պետությունը այդքան խղճուկ է, որ մի երգով պիտի քանդվի, ուրեմն թող քանդվի»:

Հեռուստադիտողների արձագանքից չափազանց զայրացած հաղորդավարը հաղորդման ավարտից առաջ կարգադրել է մեկ անգամ ևս հեռարձակել Ազնավորի երգը: Հայտնում է թուրքական «Սոնդաքիքա» լրատվական կայքը:

Ermenihaber.am