Milliyet. ՔԲԿ-ի կողմնակիցներն Անկարան վերածել են ռազմադաշտի

Հասարակական07:42, 28 Նոյեմբեր 2014

Milliyet. ՔԲԿ-ի կողմնակիցներն Անկարան վերածել են ռազմադաշտի

«Քուրդիստանի բանվորական կուսակցության» (ՔԲԿ-PKK) կողմնակիցները նախօրեի գիշերը Թուրքիայի մայրաքաղաք Անկարայում իսկական իրարանցում են սարքել: «Միլլիյեթ» պարբերականի բնորոշմամբ` դիմակավորված խմբերը մայրաքաղաքի փողոցները վերածել են ռազմադաշտի: «ՔԲԿ»-ականները հրկիզել են բանկոմատները, խանութների և աշխատանքային գրասենյակների վրա դյուրավառ հեղուկով լցված շշեր նետել:

Ոստիկանական ուժերը ստիպված են եղել ջրցան մեքենանորեվ միջամտել և փորձել վերականգնել հասարակական կարգը: Նշվում է, որ ակտիվիստները փակել են փողոցները և կաթվածահար արել նաև երթևեկությունը: Իսկ առիթը եղել է «ՔԲԿ»-ի հիմնադրման հերթական տարեդարձը` նոյեմբերի 27-ը:

Հիշեցնենք, որ «ՔԲԿ»-ը հիմնադրվել է 1978-ին Դիարբեքիրում: Հիմնադիրը քրդերի առաջնորդ Աբդուլլահ Օջալանն է (Ափո), ով այժմ ցմահ բանտարկյալ է Իմրալը կղզու թուրքական բանտում: «ՔԲԿ»-ն ավելի քան 3 տասնամյակ զինված պայքար է մղում թուրքական պետության դեմ` նպատակ ունենալով Թուրքիայի հարավ-արևելյան և Իրաքի հյուսիս-արևմտյան մասում հիմնել անկախ պետություն` Քուրդիստան: Թուրքիան, ԱՄՆ-ն, Եվրամիությունը «ՔԲԿ»-ը համարում են ահաբեկչական կազմակերպություն:

Ermenihaber.am