Ապրիլի 24-ին Ստամբուլում Հայոց ցեղասպանությանը նվիրված միջոցառումներ կանցկացվեն

Հասարակական11:50, 09 Դեկտեմբեր 2014

Ապրիլի 24-ին Ստամբուլում Հայոց ցեղասպանությանը նվիրված միջոցառումներ կանցկացվեն

Հայոց ցեղասպանության 100-ամյա տարելիցին Ստամբուլում ապրիլի 24-ին անցկացվելիք հիշատակության միջոցառումը ավելի բազմամարդ կլինի: Ստամբուլում ապիլի 24-ի հիշատակության արարողությունները անցկացվում են 2010 թվականից:

Թուրքական «Դեմոկրատ հաբեր» լրատվական կայքի տեղեկացմամբ՝ թուրքական «DurDe» («Ասա` կանգ առ») կազմակերպությունը և ամերիկյան «Project 2015-ը» կոչ են անում աշխարհի տարբեր վայրերում ապրող հայերին մասնակցել ապրիլի 24-ին Ստամբուլում կայանալիք ցեղասպանության հիշատակման միջոցառմանը:

«Project 2015-ը» խմբի անդամներից Սարա Լի Ուայթսոնը հայտարարել է, որ իրենք մեկնելու են Ստամբուլ մասնակցելու ապրիլքսանչորսյան միջոցառմանը՝ նվիրված Հայոց ցեղասպանությանը, որին զոհ են գնացել իրենց ընտանիքների անդամները: Նա նշել է, որ 100 տարի անց դեռևս Թուրքիայի իշխանությունից արդարություն են սպասում: Խմբի մեկ այլ անդամ Նենսի Գրիգորյանի համոզմամբ՝ հանցագործության վայրում ցեղասպանության զոհերի հիշատակումը մեծ իմաստ է պարունակում: Ըստ նրա՝ դա մեծ հարված կլինի Ստամբուլում հայերի ներկայության ժխտողականությանը և ոչնչացմանը:

Իսկ ահա թուրքական կազմակերպության ներկայացուցիչը Լևենթ Շենսեվերը հետևյալ հայտարարությունն է արել. «Որպես թուրքեր ցանկանում ենք քննարկել մեր հողերի ամենահին ազգերից մեկի՝ հայերի ցեղասպանության թեման և ավելի ընդլայնել քննարկման ասպարեզը: Եթե անգամ Թուրքիայի կառավարությունը դեռևս պատրաստ չէ առերեսվելու անցյալի հետ, մենք՝ Թուրքիայի քաղաքացիներս, պատրաստ ենք և ուզում ենք դա ցույց տալ աշխարհին:»

Ermenihaber.am