Նոր սկանդալ Շիշլիում. պոլսահայերը դժգոհ են Թալին Էրգյունեշի թեկնածությունից

Հասարակական07:12, 24 Մարտ 2015

Նոր սկանդալ Շիշլիում. պոլսահայերը դժգոհ են Թալին Էրգյունեշի թեկնածությունից

Ստամբուլի Շիշլիի թաղապետարանում սկանդալ է ծագել: Թուրքական «beyazgazete.com» լրատվակայքը գրում է, որ Շիշլիի նախկին և նոր թաղապետների՝ Մուսթաֆա Սարըգյուլի և Հայրի Ինոնյուի միջև լարվածությունը դեռ լրիվ չմարած, արդեն նոր ճգնաժամ է հասունանում: Այս անգամ պատճառը առաջիկա խորհրդարանական ընտրությունների պատգամավորի թեկնածուի ընտրությունն է:

Թուրքիայի գլխավոր ընդդիմադիր «Ժողովրդահանրապետական կուսակցության» (ԺՀԿ- CHP)՝ Շիշլլից առաջադրված մեջլիսի նախկին պատգամավոր Արիֆ Էրգյունեշի դստեր՝ Թալին Էրգյունեշի թեկնածության հաստատումը կուսակցությունում բողոքի մեծ ալիք է առաջացրել:

Խոսակցություններ են պտտվում, որ Շիշլիի թաղապետ Հայրի Ինոնյուն է միջամտել ու բարեխոսել իր հին ընկեր Արիֆ Էրգյունեշի դստեր համար, ԺՀԿ ղեկավար Քեմալ Քըլըչդարօղլուն էլ հաստատել է Թալին Էրգյունեշի թեկնածությունը:

Աղբյուրը նաև նշում է, որ Ստամբուլի հայկական համայնքը ևս դեմ է այս թեկնածությանը: Պոլսահայ համայնքի ներկայացուցիչները հանդիպում են պահանջում Քըլըչդարօղլուից, որպեսզ նրան հայտնեն իրենց դժգոհությունը խնդրի կապակցությամբ: Պոլսհայերը պնդում են, որ Թալին Էրգյունեշը չի ներկայացնում հայ համայնքի շահերը:

Նշենք, որ հայկական ծագումով Թուրքիայի քաղաքացի տկն Թալին Էրգյունեշը Սուրբ Հակոբ հիվանդանոցի հասարակայնության հետ կապերի վարչության տնօրեն և հայ կաթոլիկ համայնքի հոգևոր առաջնորդ Լևոն Զեքիանի՝ հասարակայնության հետ կապերի պատասխանատուն է:

Աղբյուր` Ermenihaber.am