Ստամբուլի հայկական եկեղեցու պատին` հայատյաց գրություն

Հասարակական13:38, 26 Մարտ 2015

Ստամբուլի հայկական եկեղեցու պատին` հայատյաց գրություն

Ստամբուլի Բաքըրքոյ թաղամասում գտնվող հայկական Սուրբ Աստվածածին եկեղեցու պատին անհայտ անձը կամ անձինք հակահայկական բնույթի ունեցող մակագրություն են թողել: «Ակոս» շաբաթաթերթի տեղեկացմամբ՝ մեկ օրվա տարբերությամբ եկեղեցու պատին 2 գրություն է արվել: Մարտի 24-ին արվել է առաջին գրությունը. «Ի՞նչ նշանակություն ունի բոլորիդ հայ լինելը, եթե մենք մի Օգյուն Սամասթ ունենք»: Մեկ օր անց նույն պատին մեկ այլ գրություն է հայտնվել «Օրհնյալ տարի՝ 1915»:

Միջանկյալ նշենք, որ Օգյուն Սամասթը պոլսահայ ականավոր գործիչ Հրանտ Դինքին 2007թ հունվարի 19-ին «Ակոս»-ի խմբագրատան առաջ հրազենով սպանած հանցագործն է:

Եկեղեցու հիմնադրամի նախագահ Մեսութ Օզդեմիրը հայտնել է, որ առայժմ չեն կարողացել պարզել այդ գրությունների հեղինակների ինքնությունը, քանի որ եկեղեցին գտնվում է բանուկ փողոցում: Գրությունները ծածկվել են ներկով:

Հիշեցնենք, որ փետրվարին նույն այդ եկեղեցու պատին Խոջալուի դեպքերի կապակցությամբ ռասիստական պաստառ էր տեղադրվել, որը հանվել էր ոստիկանության կողմից:

Աղբյուր` Ermenihaber.am