Եվրոպական քաղաքներից թուրքերն ամենաշատը ցանկանում են ապրել Միլանում

Հասարակական08:09, 04 Մայիս 2015

Եվրոպական քաղաքներից թուրքերն ամենաշատը ցանկանում են ապրել Միլանում

Թուրքական «Dorinsight» հետազոտական-վիճակագրական ընկերության անցկացրած հետազոտության արդյունքում պարզվել է, որ թուրքերը եվրոպական քաղաքներից ամենից շատ նախընտրում են ապրել Միլանում:

Թուրքական «Milliyet» պարբերականի վկայությամբ՝ «Եվրոպայի՝ բնակության համար ամենանախընտրելի քաղաքները» խորագրով հետազոտության շրջանակներում հարցման է ենթարկվել 8.555 հոգի: Ըստ արդյունքների՝ մասնակիցների 9 տոկոսը ցանկություն է հայտնել ապրելու Միլանում, 8 տոկոսը՝ Փարիզում, 7 տոկոսը՝ Ջենովայում և Լոնդոնում:

Այս շարքն ավելի ցածր ցուցանիշներուվ շարունակում են Ամստերդամը, Մադրիդը, Ստոկհոլմը, Կոպենհագենը, Հելսինկին, Վալետտան, Դուբլինը, Ֆրանկֆուրտը, Վիեննան և Պրահան:

Հարցման մասնակիցներն ամենաքիչը հետաքրքրություն են ցուցաբերել Վիլնյուս և Բրատիսլավա քաղաքների նկատմամբ: Նրանց միայն 0.2 տոկոսն է նախընտրել բնակվել եվրոպական նշյալ մայրաքաղաքներում: Իսկ այն հարցին, թե գոհ են արդյոք իրենց բնակության վայրից, հարցման մասնակիցների 22 տոկոսն է միայն դրական պատասխան տվել:

«Ո՞ր առանձնահատկությունների համար եք նախընտրում այս կամ այն քաղաքը» հարցին ի պատասխան հարցվածների 37 տոկոսը նշել է կրթության բարձր մակարդակը, 21 տոկոսը՝ հանգստյան օրերին հանգստի և զվարճանքի վայրերի բազմազանությունը, 18 տոկոսը՝ հանցագործությունների ցածր մակարդակը, 9 տոկոսը՝ քաղաքական կայունությունը, 8 տոկոսը՝ տրանսպորտի մատչելիությունը, 7 տոկոսը՝ առողջապահական համակարգի որակը: