Անկարայում ազգայնականները հրդեհել են քրդամետ կուսակցության գրասենյակը

Հասարակական09:01, 09 Սեպտեմբեր 2015

Անկարայում ազգայնականները հրդեհել են քրդամետ կուսակցության գրասենյակը

Թուրքիայի մայրաքաղաք Անկարայում հարձակումներ են տեղի ունեցել Թուրքիայի քրդամետ «Ժողովուրդների դեմոկրատական կուսակցության» (ԺԴԿ-ՀԴՊ) և գլխավոր ընդդիմադիր ուժ հանդիսացող «Ժողովրդահանրապետական կուսակցության» (ԺՀԿ-CHP) գրասենյակների վրա:
Թուրքական «haberler» լրատվական կայքի հաղորդմամբ` անհայտ անձինք հարձակվել են «ԺԴԿ»-ի Անկարայում գտնվող գլխավոր կենտրոնի շենքի վրա, և կոտրել են 6 հարկանի շենքի պատուհանները, իսկ շենքի երկրորդ հարկը հրդեհել, որտեղ գտնվում էր ԺԴԿ-ի արխիվային բաժինը: Հարձակման հետևանքով զոհեր և վիրավորներ չկան:

Քրդամետ կուսակցությունը, վերոնշյալ դեպքի վերաբերյալ հայտարարություն անելով, նշել է, որ գրասենյալը հարձակումից պաշտպանելու համար ոստիկանությունը իր պարտականությունները չի կատարել:

Դեպքի վերաբերյալ Թուրքիայի խորհրդարանի հայ պատգամավոր և ԺԴԿ-ի անդամ Գարո Փայլանը հանդես է եկել հայտարարությամբ` ասելով.
«Երեկոյան ժամը 19:30-ին այլատյացների մի խումբ հավաքվել է գրասենյակի մուտքի մոտ: Ոստիկանություն թողտվությամբ նրանք փորձել են հրդեհել շենքը: Սա մեծ սադրանք է: Այս հարձակումները այլ անկարգությունների համար ճանապարհ են բացում»:

Ազգայնականների մեկ այլ խումբ էլ հարձակվել է ընդդիմադիր Ժողովրդահանրապետական կուսակցության (ԺՀԿ-CHP) Անկարայում գտնվող գրասենյակներից մեկի վրա: Հարձակվողները կոտրել են գրասենյակի ողջ գույքը:

Աղբյուր` Ermenihaber.am