Ըստ գենդերային անհավասարության՝ Թուրքիան աշխարհում 130-րդն է

Հասարակական13:24, 20 Նոյեմբեր 2015

Ըստ գենդերային անհավասարության՝ Թուրքիան աշխարհում 130-րդն է

Համաշխարհային տնտեսական ֆորումի (ՀՏՖ-WEF) հրապարակած «Գենդերային անհավասարության հաշվետվության» համաձայն` Թուրքիան 145 երկրների ցանկում 130-րդ տեղն է զբաղեցրել: Ըստ թուրքական «Hürriyet» պարբերականի կայքի՝ Ադրբեջանն այս ցուցակում գրավել է 96-րդ, իսկ Հայաստանը՝ 105-րդ տեղը:

Ըստ ՀՏՖ-ի հաշվետվության՝ Թուրքիայում 100 կանանցից աշխատում է 37-ը: Այդ ցուցանիշով Թուրքիան աշխարհում 103-րդ տեղն է զբաղեցնում: Առաջին տեղում է Բելոռուսիան, որտեղ աշխատող 100 քաղաքացուց 73-ը կին է:

Հաշվետվությունից պարզ է դառնում նաև, որ Թուրքիայում 100 կանանցից միայն 13-ն են բարձրաստիճան պաշտոններ զբաղեցնում: Այս տեսակետից Թուրքիան 109-րդ հորիզոնականում է: Իսկ առաջին հորիզոնականում Ֆիլիպիններն է, որտեղ 100 կանանցից 57-ը բարձր աշխատանքային պաշտոն է զբաղեցնում:

Թուրքիայի ազգային մեծ ժողովի (ԹԱՄԺ-TBMM) 100 պատգամավորից միայն 18-ն է կին: Այս առումով Թուրքիան 145 երկրների շարքում 86-րդն է: Ըստ այս չափանիշի առաջին տեղում է Ռուանդան, որտեղ 100 պատգամավորից 64-ը կին է:

Իսկ նախարարությունների վերաբերյալ արձանագրվել է, որ Թուրքիայում կանանց կողմից ղեկավարվող միակ նախարարությունը տարիներ շարունակ Ընտանիքի և սոցիալական քաղաքականության նախարարությունն է: Դա կազմում է նախարարությունների ընդհանուր թվի 4 տոկոսը: Աշխարհում ամենաշատ կին նախարարներ ունի Ֆինլանդիան, որտեղ կանայք ղեկավարում են նախարարությունների 63 տոկոսը:

ՀՏՖ-ն արձանագրել է նաև, որ Թուրքիայում կանանց կյանքի միջին տևողությունը 67 տարի է, իսկ տղամարդկանցը՝ 63:

Աղբյուր` Ermenihaber.am