Twitter-ի թուրքական հատվածը խոսում է խոցված ռուսական ինքնաթիռի մասին

Հասարակական12:59, 25 Նոյեմբեր 2015

Twitter-ի թուրքական հատվածը խոսում է խոցված ռուսական ինքնաթիռի մասին

«Twitter» սոցիալական ցանցի թուրքական հատվածում վերջին երկու օրվա ամենաքննարկվող թեման Թուրքիայի օդուժի կողմից ռուսական SU-24 ռազմական ինքնաթիռի խոցման միջադեպն է: Մինչ թուրք օգտատերերի մի մասը գովում և շնորհակալություն է հայտնում նախագահ Ռեջեփ Թայիփ Էրդողանին և Թուրքիայի զինված ուժերին՝ համարելով, որ ինքնաթիռի խոցումը ճիշտ էր, մի հատվածն էլ փորձում է հասկանալ, թե իրավիճակն ինչ զարգացումներ կունենա:

Յուսուֆ Մենեթեշ անունով օգտատերը շնորհակալություն է հայտնել Էրդողանին ուսուցիչների օրը թուրք կործանիչների հրաշալի ելույթի համար:

Սյումեյյե անունով օգտատերը գովասանքի խոսքեր է գրել Թուրքիայի ԶՈՒ հասցեին. «Խփի՛ր, դու սպանելիս էլ, հարվածելիս էլ գեղեցիկ ես»:

Մի օգտատերը գրել է, որ Թուրքիան և Ռուսաստանը բարեկամ երկրներ չեն, իսկ շատ անհանգստացողներին խորհուրդ է տվել ռուսների, հայերի և ֆրանսիացիների հետ եղբայրություն չանել և հեռանալ Թուրքիայից:

Ջեմ Օզթյուրքը գրել է. «Ռուս խփելը մեր արյան մեջ է, ինչ անենք»:
Գանի Հարթավին նշում է, որ սա լավ ապտակ էր ռուս իմպերիալիստներին:

Ալփ Թութալը գրում է, որ եթե Պուտինը գազն անջատի, ռուսական ինքնաթիռ կխոցեն ու կտաքանան:

Նուրշահ Գյունշը զգուշացրել է, որ Ռուսաստանի նախագահ Վլադիմիր Պուտինը դատարկախոս մարդ չէ:

Արաս Դաղլըն համոզված է, որ ինքնաթիռը խոցելու հրաման է եղել, քանի որ հիմնականում նման սահմանային խախտումների վրա աչք են փակում:

Մեհմեթ Օզջանի կարծիքով՝ Ռուսաստանի կողմից բազմաթիվ սահմանախախտումներից և Թուրքիայի զգուշացումներից հետո, Թուրքիայի դիրքորոշումը միջազգային իրավունքի և երկրի ինքնիշխանության պաշտպանության տեսանկյունից ճիշտ է եղել:

Էնիս Էրսոյը, կիսվելով նախագահ Էրդողանի հայտարարությունից ստացած տպավորությունով, գրում է. «Ինչքան հասկացա, ինքնաթիռը խոցել են, ոչ թե սահմանը հատելու համար, այլ այն պատճառով, որ Ռուսաստանը հարվածում է թուրքմեններին»:

Աղբյուր` Ermenihaber.am