Թուրքիայում քուրդ բնակչության մի մասը բախումների պատճառով լքում է տները

Հասարակական08:00, 14 Դեկտեմբեր 2015

Թուրքիայում քուրդ բնակչության մի մասը բախումների պատճառով լքում է տները

Թուրքիայի հարավ-արևելյան մի քանի շրջաններից, որտեղ վերջին շրջանում պարետային ժամի պայմաններում տևական բախումներ էին տեղի ունենում թուրք ուժայինների ու քուրդ զինյալների միջև, պարետային ժամերի չեղարկումից հետո սկսվել է բնակչության հեռացում:

Թուրքիայի Դիարբեքիր նահանգի Սուր շրջանում 9 օր տևած պարետային ժամը 3 օր առաջ չեղարկվել էր, սակայն 17 ժամ չանցած կրկին պարետային ժամ հայտարարվեց: 17 ժամվա ընթացքում բնակչության մի մասը դուրս եկավ շրջանից` տեղափոխվելով երկրի ավելի անվտանգ շրջաններ: Այս պահին շրջանում շարունակվում են կատաղի բախումները Թուրքիայի ոստիկանության հատուկ ստորաբաժանումների ու «Քուրդիստանի բանվորական կուսակցության» (ՔԲԿ-PKK) զինյալների միջև:

Ըստ թուրքական «Milliyet» թերթի կայքի` բնակչության գաղթ է սկսվել նաև Մարդին նահանգի Նուսայբին (Մծբին) շրջանից, որտեղ օրեր առաջ է չեղարկվել պարետային ժամը:

Շրջանի Աբդուլքադիր փաշա, Ֆըրաթ, Դիջլե և Յենիշեհիր թաղամասերի բնակչությունը զանգվածաբար լքում է տները: Աղբյուրի հաղորդմամբ` նրանց մի մասը տեղափոխվում է հարևան ավելի ապահով շրջաններ, իսկ մնացածը` Ստամբուլ, Իզմիր և այլ մեծ քաղաքներ:

Թուրքիայի Շըրնաք քրդաբնակ նահանգի Սիլոփի և Ցիզրե շրջաններից էլ մասսայաբար հեռանում են ուսուցիչները:

Ջիզրեի 104 դպրոցներում աշխատող 1298 ուսուցիչների զգալի մասը, որոնց ընտանիքներն այլ շրջաններում են բնակվում, լքում են Ջիզեն:

Նշվում է, որ հեռացող մարդկանց թիվն այնքան մեծ է, որ միջքաղաքային տրանսպորտը չի հասցնում բոլորին տեղափոխել, ինչի պատճառով ավտոկայաններում մեծ հերթեր են գոյանում:

Աղբյուր` Ermenihaber.am