ERMENI HABER AJANSI

Բրիտանական հանրահայտ պարբերական «The Guardian»-ը «Արդյո՞ք անվտանգ է Թուրքիա հանգստի մեկնելը» վերնագրով հոդված է հրապարակել: BBC-ի թուրքական ծառայության տեղեկացմամբ՝ հոդվածում շեշտվում է այն հանգամանքը, որ նախկինում զբոսաշրջիկները կարող էին հրաժարվել Թուրքիա մեկնելուց՝ երկրի մարդաշատ լինելու պատճառով, իսկ ահաբեկչական հարձակումներից հետո արդեն հրաժարվելու միակ պատճառը անվտանգության ցածր մակարդակն է:

«Guardian»-ը ուշադրություն է հրավիրում այն փաստին, որ ահաբեկչությունները բացասական են ազդում թուրքական զբոսաշրջության ոլորտի վրա:

«Մի հետազոտության համաձայն՝ փետրվարին այս երկիր այցելած զբոսաշրջիկների թիվը նախորդ տարվա համեմատ 10 տոկոսով նվազել է: Ինչպես երևում է՝ ամռանը վիճակն էլ ավելի է վատթարանալու: «Tui» տուրիստական ընկերությունում ամառային տուրերի ամրագրումները 40 տոկոսով նվազել են: Իսկ GfK հետազոտական ընկերության տվյալներով դեպի Թուրքիա տուրերի ամառային ամրագրումները նվազել են 32 տոկոսով», - գրում է թերթը՝ հիշեցնելով, որ նախորդ տարի ամռանը թուրքական տուրերի պահանջարկը աճել էր 11 տոկոսով:

Անգլիական պարբերականը նշում է, որ բազմաթիվ զբոսանավեր իրենց երթուղիներից հանել են թուրքական կանգառները, իսկ որոշ ընկերություններ, ինչպես օրինակ «Mark Warner»-ը, ընդհանրապես դուրս են եկել երկրից:

«Risk Advisory Group» անվտանգության ռիսկերի գնահատման ընկերության ներկայացուցիչ Հենրի Վիլկինսոնի խոսքով՝ Թուրքիայում իրապես առկա է որոշակի վտանգ, որը զբոսաշրջիկները պետք է հաշվի առնեն:

«Արձանագրվել է, որ վերջին 12 ամսում Թուրքիայում 258 ահաբեկչական գործողություն է իրականացվել: Դրանց մեծ մասը երկրի հարավ - արևելյան շրջաններում է եղել, որտեղ ակտիվ է Քուրդիստանի բանվորական կուսակցությունը» (ՔԲԿ - PKK)», -գրում է թերթը:

Վիլկինսոնը նշում է, որ թեև Ստամբուլում ահաբեկչություններն իրականացվում են մարդաշատ վայրերում, որտեղ մեծ է նաև զբոսաշրջիկների գտնվելու հավանականությունը, սակայն Թուրքիայում ավելի մեծ վտանգ սպառնում է բանակի, պետական կառույցների ներկայացուցիչներին, քաղաքական գործիչներին, իսկ շարքային զբոսաշրջիկների համար ահաբեկչության թիրախ դառնալու հավանականությունը ավելի փոքր է: