Թուրք հաքերները կոտրել են Բունդեսթագի պատգամավոր Ջեմ Օզդեմիրի կայքը

Հասարակական07:14, 07 Հունիս 2016

Թուրք հաքերները կոտրել են Բունդեսթագի պատգամավոր Ջեմ Օզդեմիրի կայքը

«Առյուծ զինվորների թիմ» (Aslan Neferler Tim) անվամբ թուրքական հաքերային խումբը կոտրել է Գերմանիայի «Կանաչների կուսակցության» համանախագահ, ազգությամբ թուրք Ջեմ Օզդեմիրի անձնական կայքը (www.oezdemir.com): Օզդեմիրը վերջերս Գերմանիայի խորհրդարանում ընդունված Հայոց ցեղասպանության բանաձևի ակտիվ համահեղինակներից է:

Ինչպես տեղեկացնում է թուրքական «Haberturk» լրատվական կայքը, հաքերների նշյալ խումբը սոցցանցերում հայտարարություն է տարածել այն մասին, որ շարունակելու է կիբեռհարձակումները Օզդեմիրի դեմ:

Հիշեցնենք, որ Գերմանիայի խորհրդարանը հունիսի 2-ին Հայոց ցեղասպանությունը ճանաչող բանաձև էր ընդունել: Բանաձևին կողմ էին քվեարկել նաև Բունդեսթագի՝ 11 թուրք պատգամավորներից 7-ը՝ այդ թվում նաև Օզդեմիրը: Բանաձևի ընդունումից հետո Օզդեմիրը բազմաթիվ սպառնալիքներ է ստացել, ինչից հետո անվտանգության նկատառումներով գերմանական ոստիկանությունը Օզդեմիրի, նրա ընտանիքի և բնակարանի նկատմամբ հսկողություն է սահմանել:

Աղբյուր` Ermenihaber.am