ERMENI HABER AJANSI

«Objective Research Center» հետազոտական կենտրոնը հուլիսի 15-ին Թուրքիայում իրականացված ռազմական հեղաշրջման ձախողված փորձից հետո առաջին սոցհարցումն է կատարել:

Թուրքական իշխանամետ «Sabah» թերթը ներկայացրել է հետազոտական կենտրոնի ստացած արդյունքները: Հարցումն անցկացվել է Թուրքիայի 81 նահանգից 33-ում, հարցմանը մասնակցել է 656 մարդ: Նրանց ուղղել են հարցեր, որոնց նպատակն է եղել պարզել պետական գերատեսչությունների, իշխանությունների, պետական գործիչների նկատմամբ վստահության մակարդակը:

Հարցվածների 95%-ը վստահ է, որ հեղաշրջման փորձն իրականացրել է ամերիկաբնակ թուրք միլիարդատեր, իսլամի քարոզիչ Ֆեթուլլահ Գյուլենը և նրա ղեկավարած գյուլենական համայնքի ներկայացուցիչները: Միայն 5 տոկոսն է կասկածում, որ հեղաշրջման փորձի հետևում կանգնած են գյուլենականները:

73.5%-ն աջակցում է հեղաշրջման փորձից հետո ամբողջ երկրով մեկ մտցված արտակարգ դրություն սահմանելու որոշմանը, 26.5%-ը չի աջակցում:

Պետական և քաղաքական գործիչների նկատմամբ վստահության մակարդակով առաջատարը Թուրքիայի նախագահ Ռեջեփ Թայիփ Էրդողանն է: Նրան վստահում  է հարցվածների 79%-ը:

Վարչապետ Բինալի Յըլդըրըմին և կառավարությանը վստահում է 72.3%-ը, չի վստահում 27.7%-ը:

Երկրի օրենսդիր իշխանության նկատմամբ վստահելիությունը կազմում է 73.4%, իսկ ոստիկանությանը վստահելիությունը՝  75%:

Հարցման մասնակիցները ընդդիմադիր գործիչներից ամենաշատը վստահում են «Գորշ գայլեր» ահաբեկչական կազմակերպության քաղաքական թևը համարվող «Ազգայնական շարժում» կուսակցության (MHP-ԱՇԿ) նախագահ Դևլեթ Բահչելիին՝ 70%: Գլխավոր ընդդիմադիր «Ժողովրդահանրապետական կուսակցության» (CHP-ԺՀԿ) նախագահ Քեմալ Քըլըչդարօղլուին վստահում է հարցվածների 49.2%-ը, չի վստահում 50.8%-ը:

Իսկ քրդամետ «Ժողովուրդների դեմոկրատական» կուսակցության (HDP-ԺՀԿ) համանախագահ Սելահաթթին Դեմիրթաշի նկատմամբ վստահելիությունը ամենացածրն է՝ ընդամենը 6 տոկոս:

Հարցման մասնակիցների 91.5%-ը կողմ է, որ «հայրենիքի դավաճանության և ահաբեկչության» մեջ մեղադրվողները մահապատժի ենթարկվեն: