Ահաբեկչական պայթյուն Թուրքիայում (տեսանյութ)

Հասարակական08:14, 22 Օգոստոս 2016

Ահաբեկչական պայթյուն Թուրքիայում (տեսանյութ)

Օգոստոսի 20-ին երեկոյան Թուրքիայի հարավարևելյան Գազիանթեփ (պատմ. Այնթափ) նահանգի Շահինբեյ շրջանի Բեյբահչե թաղամասում հարսանյաց արարողության ժամանակ տեղի է ունեցել հուժկու պայթյուն: Նախնական վարկածով՝ իրականացված ահաբեկչական գործողության զոհերի թիվը հասել է 53-ի, իսկ վիրավորների թիվը` 94-ի:

Ըստ թուրքական «Haberturk» լրատվական ծառայության` կատարվածի կապակցությամբ հայտարարությամբ է հանդես եկել Թուրքիայի նախագահ Ռեջեփ Թայիփ Էրդողանը և մի շարք պաշտոնյաներ: Ըստ Էրդողանի՝ պայթյունն իրականացրել է 12-14 տարեկան դեռահաս: Թուրքիայի նախագահը հիմնվելով, ոստիկանության կողմից տարամադրած տեղեկատվության վրա, ընդգծել է, որ ամենայն հավանականությամբ գործողությունն իրականացվել է «Իսլամական պետություն» (ԻՊ) ահաբեկչական կազմակերպության կողմից:

Նշենք, որ առայժմ ոչ մի խմբավորում կամ կազմակերպություն չի ստանձնել ահաբեկչական գործողության պատասխանատվությունը:

Տեղեկացնենք նաև, որ մահապարտը պայթուցիկ սարքը գործադրել էր այն ժամանակ, երբ մարդկանց մի մեծ խումբ փողոց էր դուրս եկել տոնակատարությունը շարունակելու նպատակով: