Բանտում վատացել է քրդամետ կուսակցության համանախագահի առողջական վիճակը

Հասարակական12:43, 12 Դեկտեմբեր 2016

Բանտում վատացել է քրդամետ կուսակցության համանախագահի առողջական վիճակը

Թուրքիայի ընդդմիադիր քրդամետ «Ժողովուրդների դեմոկրատական կուսակցության» (HDP-ԺԴԿ) համանախագահ Սելահաթթին Դեմիրթաշը շաբաթ օրը բանտում սրտի անոթների սպազմ է ունեցել:

Թուրքական «Birgün» թերթի կայքի տեղեկացմամբ՝ այս մասին «Twitter»-ի մկիրոբլոգում հայտնել քրդամետ կուսակցության մամուլի խոսնակ Այհան Բիլգենը: Նա, նշելով, որ լուրջ մտահոգություններ ունեն Դեմիրթաշի առողջական վիճակի առնչությամբ գրել է. «Չնայած հաշվետվություններ կան, որ Դեմիրթաշը նախկինում նույնպես սրտի խնդիրներ է ունեցել, նա զրկված է անհրաժեշտ բժշկական ծառայությունից: Դիմելու ենք Բժշկական միությանը՝ Դեմիրթաշի բժշկական զննությունը հիվանդանոցում անկողմնակալ բժիշկների վերահսկողությամբ կատարելու համար»:

Հիշեցնենք, որ նոյեմբերի 4-ի առավոտյան ձերբակալվել էին ԺԴԿ-ի համանախագահներ Սելահաթթին Դեմիրթաշի և Ֆիգեն Յուքսեքդաղը, ինչպես նաև կուսակցության անդամ ևս 9 պատգամավոր: Ձերբակալվածներից 9-ի, այդ թվում՝ 2 համանախագահների վերաբերյալ կալանավորման որոշում է կայացվել: ԺԴԿ-ական գործիչները մեղադրվում են ահաբեկչական խմբավորումների հետ համագործակցության մեջ: Դեմիրթաշը արդեն տեղափոխվել է Էդիրնեի, իսկ Յուքսեքդաղը՝ Քոջաելիի բանտ:

Աղբյուր` Ermenihaber.am