«Այո» ասելու դեպքում Թուրքիան իրեն կդատապարտի Էրդողանի բռնապետությանը:

Հասարակական14:01, 13 Ապրիլ 2017

«Այո» ասելու դեպքում Թուրքիան իրեն կդատապարտի Էրդողանի բռնապետությանը:

Բրիտանական հայտնի «Economist»-ը անդրադարձել է Թուրքիայում ապրիլի 16-ին կայանալիք սահմանադրական փոփոխությունների հանրաքվեին:

«Թուրքիայում շարունակվում է բռնապետությունը» հոդվածում մասնավորապես ասվում է, որ սահմանդրական փոփոխություններ իրականացնելու` այսինքն կառավարման նախագահական համակարգին անցում կատարելու դեպքում երկրում կշարունակվի պահպանվել «առկա բռնապետական ռեժիմը»:

Ըստ հոդվածի` Թուրքիան վերջին տարիներին Ռեջեփ Թայիփ Էրդողանի պատճառով հետընթաց է ապրել:

«Երկիրը կարող է դեմ հանդիման մնալ խորհրդարանի կողմից շատ քիչ սահմանափակվող իրավունքներով 21-րդ դարի սուլթանի հետ: «Այո» ասելու դեպքում Թուրքիան կարող է իրեն դատապարտել Էրդողանի բռնապետությանը: Իսկ ոչ-ը` թուրքերին հնարավորություն կտա Էրդողանի իշխանությունը սահմանափակել»:

Հոդվածում շեշտվում է նաև, որ չնայած իշխանության եկած «Արդարություն և զարգացում» կուսակցությունը սկզբնական շրջանում թե տնտեսական, թե քաղաքական զարգացման տեսանկյունից շատ գործ արեց, այնուամենայնիվ, վերջին տարիներին նրանց վարած քաղաքականությունում մի շարք բացթողումներ կան: Սիրիայում կռվող ջիհադականները և քուրդ զինյալները Թուրքիայի հետ պատերազմական իրավիճակում են գտնվում: Բացի դրանից երկրի վրա բացասական ազդեցություն է թողել 2016թ. տեղի ունեցած ռազմական հեղաշրջման փորձը, որի իրականացման մեջ կասկածվում է ամերիկաբնակ իսլամի քարոզիչ Ֆեթթուլահ Գյուլենը:

Աղբյուր` Ermenihaber.am