Թուրքիայում բազմամուսնությունը խթանող նոր կայքը արգելափակվել է

Հասարակական11:21, 14 Դեկտեմբեր 2017

Թուրքիայում բազմամուսնությունը խթանող նոր կայքը արգելափակվել է

Թուրքիայի «Տեղեկատվական տեխնոլոգիաների և հեռահաղորդակցության» խորհուրդը (BTK) արգելափակել է երկրորդ ամուսնության համար զուգընկեր որոնողների համար բացված կայքը: Ինչպես տեղեկացնում է «CNNTürk»-ը՝ կայքն, այնուամենայնիվ, հասանելի է Թուրքիայից դուրս գտնվող օգտատերերի, ինչպես նաև՝ VPN-ից (Virtual Private Network- վիրտուալ մասնավոր ցանց) օգտվողների համար:

Իսկ Թուրքիայի կանանց միությունների ֆեդերացիան հայտարարել է, որ պատրաստվում է դատական գործ հարուցել կայքի դեմ:

Օրեր առաջ Թուրքիայում գործարկված նոր ծանոթությունների կայքը հնարավորություն է տալիս օգտատերերին՝ խիստ գաղտնիության պայմաններում նոր կյանքի ընկեր գտնել՝ առանց վտանգելու արդեն ունեցած առաջին ընտանիքը: Օգտատերերը կարող են իրենց նոր զուգընկերոջ հետ կրոնական ամուսնություն կնքել:

Կայքի գործարկման մասին տարածված հայտարարության համաձայն՝ նման ծանոթության հարթակներ ներկայումս գոյություն ունեն միայն Անգլիայում և Ինդոնեզիայում:

Ըստ կայքի հիմնադիրների՝ երկրորդ ամուսնությունը կարող է լավ լուծում լինել մի շարք հասարակական խնդիրների, այդ թվում՝ աղքատության, միայնակության, անբարոյականության տարածման դեմ:

Աղբյուր` Ermenihaber.am