Քաղցկեղի ո՞ր տեսակներն են առավելապես տարածված Թուրքիայում

Հասարակական09:23, 07 Ապրիլ 2018

Քաղցկեղի ո՞ր տեսակներն են առավելապես տարածված Թուրքիայում

Քաղցկեղի դեմ պայքարի թուրքական հիմնադրամի տնօրեն, պրոֆեսոր Մեթին Էրթեմը ուշագրավ տվյալներ է հրապարակել Թուրքիայում քաղցկեղի տեսակների տարածվածության վերաբերյալ։

Էրթեմը նշել է, որ Թուրքիայի բնակչության շուրջ 60 տոկոսը պարբերաբար ծխախոտ է օգտագործում, ինչը շատ հաճախ վճռորոշ նշանակություն է ունենում ոչ միայն թոքերի, այլև ստամոքսի, ենթաստամոքսային գեղձի, միզապարկի քաղցկեղի առաջացման հարցում։

Թուրքիայի տարածքում տղամարդկանց շրջանում հատկապես տարածված են թոքերի, շագանակագեղձի, միզապարկի, ստամոքսի և հաստ աղիքի քաղցկեղը, կանանց շրջանում ամենից հաճախ հանդիպում են կրծքագեղձի, վահանաձև գեղձի, սեռական օրգանների քաղցկեղը:

Ուշագրավ է, որ երկրի տարբեր շրջաններում տարածված են հատկապես քաղցկեղի որոշակի տեսակներ։ Ըստ Էրթեմի՝ Մարմարայի տարածաշրջանում տղամարդկանց մոտ առավելապես տարածված են թոքերի, շնչափողի, միզապարկի և ստամոքսի քաղցկեղը, իսկ կանանց շրջանում՝ կրծքագեղձի և վահանձև գեղձի։

Արևելյան և Հարավարևելյան Անատոլիայում, Էրզրումում առավել հաճախ հանդիպում է կերակրափողի և ստամոքսի քաղցկեղը, ինչը, ըստ մասնագետի, պայմանավորված է նաև տաք ուտելիքների, տաք թեյի պարբերական օգտագործմամբ։

Կենտրոնական Անատոլիայում տարածված են թոքերի, ստամոքսի և հաստ աղիքի քաղցկեղը։ Իսկ Թուրքիայի ափամերձ գոտիներում առավել հաճախ հանդիպում է միզապարկի քաղցկեղը։

Աղբյուր` ntv.com.tr