Թուրքիայի արտգործնախարարը ռուսերեն կոչով դիմել է ռուս զբոսաշրջիկներին

Հասարակական12:43, 07 Մայիս 2018

Թուրքիայի արտգործնախարարը ռուսերեն կոչով դիմել է ռուս զբոսաշրջիկներին

Թուրքիայի արտգործնախարար Մևլութ Չավուշօղլուն թուրքական «CNNTurk» լրատվամիջոցի հետ զրուցում կոչ է արել ռուս զբոսաշրջիկներին ամառային հանգիստն անցկացնել ծովափնյա Անթալիայում և Ալանիայում։

Իր կոչը ավելի գրավիչ դարձնելու համար Չավուշօղլուն այն հնչեցրել է ռուսերեն լեզվով։

Թուրքիայի արտգործնախարարը, մի շարք սխալներ թույլ տալով և չափազանց վատ առոգանությամբ, ասել է.

«Ալանյան և Անթալիան ինձ համար շատ հարազատ քաղաքներ են։ Ռուսների համար էլ է արդեն այդպես։ Մենք շատ ուրախ ենք ռուսներին հյուրընկալել։ Թուրքիան գեղեցիկ երկիր է, իսկ Անթալիան գեղեցիկ քաղաք։ Իսկ թուրքական խոհանոցը ախորժելի է»։

Թուրքիայի արտգործնախարարի կոչը մեծ արձագանք է ունեցել սոցցանցերում։ Ռուս օգտատերերից մեկը մեկնաբանել է. «Ինչ էլ շուտ մոռացան իրենց կողմից խոցված ռուսական ինքնաթիռը»։

Մեկ այլ օգտատեր էլ գրել է. «Չավուշօղլուն ռուսերեն է սովորում, որպեսզի կարողանա իր լոլիկները արտահանել ռուսական շուկա: Բացի այդ էլ երևի նա մեր լեզուն սովորում է, որպեսզի կարողանա կարդալ «S-400»-ների օգտագործման կարգը»։