Իսրայելի դեմ ուղղված բազմահազարանոց ցույց Ստամբուլում

Հասարակական05:30, 15 Մայիս 2018

Իսրայելի դեմ ուղղված բազմահազարանոց ցույց Ստամբուլում

Ստամբուլում Իսրայելի դեմ բողոքի զանգվածային միջոցառումներ են տեղի ունեցել: Հազարավոր ցուցարարներ իրենց դժգոհությունն են հայտնել մայիսի 14-ին իսրայելապաղեստինյան բախումների առնչությամբ։

Բախումների պատճառ է դարձել Երուսաղեմում ԱՄՆ-ի դեսպանատան բացումը։ Ավելի վաղ ԱՄՆ-ի նախագահ Դոնալդ Թրամփը որոշում էր ընդունել Երուսաղեմը ճանաչել որպես Իսրայելի մայրաքաղաք, ինչը լուրջ դժգոհություն էր առաջացրել արաբական աշխարհում, ինչպես նաև Թուրքիայում։ Ի պատասխան դեսպանատան բացմանը՝ պաղեստինյան կառույցները Գազայի հատվածում սկսել էին մասսայական բողոքի գործողություններ՝ իրենց բողոքն արտահայտելու ամերիկյան և իսրայելական իշխանությունների գործողությունների դեմ:

Բողոքի ցույցերի պատճառով ժամանակավորապես փակվել են Ստամբուլի մի շարք կենտրոնական փողոցներ։ Ակցիայի մասնակիցներն իրենց գործողությունները սկսել են Ստամբուլի Իսթիքլալ պողոտայի թունելից։