Թուրքիայում նախագահի թեկնածուին քննադատում են էրոտիկ բանաստեղծություններ գրելու համար

Հասարակական11:16, 19 Հունիս 2018

Թուրքիայում նախագահի թեկնածուին քննադատում են էրոտիկ բանաստեղծություններ գրելու համար

Թուրքիայի գլխավոր ընդդիմադիր ուժ համարվող «Ժողովրդահանրապետական» կուսակցության (CHP-ԺՀԿ) կողմից նախագահի թեկնածու առաջադրված Մուհարրեմ Ինջեն հայտնվել է քննադատությունների թիրախում:

Պատճառն այն է, որ տարիներ առաջ Ինջեի հեղինակած գրքում տեղ են գտել էրոտիկ բնույթի բանաստեղծություններ, հենց որոնք էլ լայն քննարկման առարկա են դարձել սոցցանցերում:

Իր հակառակորդին քննադատելու առիթը բաց չի թողել նաև իշխող «Արդարություն և զարգացում կուսակցության» (AKP-ԱԶԿ) կողմից թեկնածու առաջադրված գործող նախագահ Ռեջեփ Թայիփ Էրդողանը: Նա Սամսունում կազմակերպված հանրահավաքի ժամանակ, ակնարկելով Ինջեին և նրա հեղինակած գիրքը, ասել է.

«Դիմակի տակ թաքնվածների իրական կողմերը բացահայտելու ենք: Այդ գրքում գրված որոշ արտահայտություններ չեմ կարդալու, բայց երիտասարդները կտեսնեն, թե ինչեր կան այնտեղ»:

Ընդդիմադիր գործիչը, արձագանքելվ բոլոր քննադատություններին, ասել է. «Ահա թե ինչ, գիրքը գրել եմ 30 տարի առաջ և չեմ վաճառել: Գրքերի կողքին արկղ էի դրել, որ ցանկացողները գումար գցեն: Այդ գումարով էլ, որպես ֆիզիկայի ուսուցիչ, դպրոցի համար լաբորատորիա եմ հիմնել»:

Աղբյուր` Sabah