Էրդողանը թեյի է հրավիրել «Թայիփների աշխարհը» ծաղրական պաստառը պարզած ուսանողներին

Հասարակական10:06, 11 Հոկտեմբեր 2018

Էրդողանը թեյի է հրավիրել «Թայիփների աշխարհը» ծաղրական պաստառը պարզած ուսանողներին

Թուրքիայի նախագահ Ռեջեփ Թայիփ Էրդողանը թեյի է հրավիրել Անկարայի Մերձավոր Արևելքի տեխնիկական համալսարանի 4 ուսանողների, ովքեր 2018 թվականի ավարտական միջոցառման ժամանակ պարզել էին «Թայիփների աշխարհը» ծաղրական պաստառը:

Էրդողանի բողոքից հետո Անկարայի գլխավոր դատախազության սկսած հետաքննության շրջանականերում ուսանողները ձերբակալվել էին, սակայն 1 ամիս անց դատարանի որոշմամբ ազատ էին արձակվել:

Հաղորդվում է, որ Էրդողանը հրավերն ուղարկել է իր փաստաբանի միջոցով: Ուսանողները դրական պատասխան են տվել հրավերին:

Հիշեցնենք, որ «Թայիփների աշխարհը» խորագրով պաստառը, դեռևս տարիներ առաջ նկարել են թուրքական «Պինգվին» ամսագրի կարիկատուրիստները: 2005 թվականին հրապարակված ծաղրանկարի համար այն ժամանակվա վարչապետ Էրդողանը պահանջել էր 40 հազար թուրքական լիրա փոխհատուցում: Սակայն անկարայի 1-ին ատյանի դատարանը 2016 թվականին կայացրած որոշմամբ մերժել էր Էրդողանի հայցը:

Ծաղրանկարի վրա պատկերված են տարբեր կենդանիներ, որոնց գլուխների փոխարեն Թուրքիայի նախագահի գլուխն է:

Աղբյուր` Demokrathaber