Թուրքիայում երիտասարդների գրեթե կեսն իրեն դժբախտ է համարում

Հասարակական12:31, 16 Մայիս 2019

Թուրքիայում երիտասարդների գրեթե կեսն իրեն դժբախտ է համարում

Թուրքիայի վիճակագրական ընկերությունը (TÜİK) տվյալներ է հրապարակել երկրի երիտասարդ բնակչության վերաբերյալ։

Ըստ այդմ՝ 2018թ․ դեկտեմբերի դրությամբ 82 մլն 3․882 բնակիչ ունեցող Թուրքիայում 15-24 տարեկանների թիվը կազմում է 12 մլն 971․396 կամ բնակչության ընդհանուր թվի 15․8 տոկոսը։

Երիտասարդ քաղաքացիների՝ իրենց կյանքից գոհունակության մակարդակի ուսումնասիրության արդյունքում պարզվել է, որ 18-24 տարեկանների միայն 55․4 տոկոսն է իրեն երջանիկ համարում։ Ընդ որում՝ այս տարիքային խմբում երջանկության առաջնային չափանիշներն են առողջությունը (50 տոկոսի համար) և հաջողությունը (20 տոկոսի համար)։ Արձանագրվել է նաև, որ աշխատող երիտասարդների 76 տոկոսը գոհ է իր աշխատանքից, իսկ 48․7 տոկոսը գոհ է իր վաստակած գումարից։

2018թ․ Թուրքիայի երիտասարդների շրջանում գործազրկությունը կազմել է 20․3 տոկոս։ Ընդ որում՝ տղամարդկանց շրջանում գործազրկությունը 17․6 տոկոս է, իսկ կանանց շրջանում 25․3 տոկոս։ 2018թ․ ընթացքում ոչ կրթություն ստացող, ոչ էլ աշխատանք ունեցող երիտասարդների կազմում են այս տարիքային խմբի 24․5 տոկոսը։ Պարզվել է նաև, որ 2018թ․ դրությամբ Թուրքիայի երիտասարդների 58․3 տոկոսը գոհ է իր ստացած կրթությունից։

Աղբյուր` t24.com.tr