Մարդկանց աշխատանքային և ազատ ժամերի հավասարակշռության առումով Թուրքիան վատ ցուցանիշներ ունի

Հասարակական15:00, 28 Օգոստոս 2019

Մարդկանց աշխատանքային և ազատ ժամերի հավասարակշռության առումով Թուրքիան վատ ցուցանիշներ ունի

Թուրքիան բնակիչների աշխատանքի և ազատ ժամանակի հավասարակշռության առումով չափազանց վատ ցուցանիշներ ունի: «Տնտեսական համագործակցության և զարգացման կազմակերպության» (OECD) հրապարակած զեկույցի համաձայն՝ Թուրքիայում աշխատողների զգալի մասը օրական սահմանված աշխատաժամերից ավելի երկար է աշխատում։ Շաբաթական ավելի քան 50 ժամ աշխատողները Թուրքիայում կազմում են 32.6 տոկոս, մինչդեռ OECD անդամ մյուս երկրներում այդ ցուցանիշը 11 տոկոս է:

Արտաժամյա աշխատանքի առումով առաջին հորիզոնականում գտնվող Թուրքիան առաջատարներից է նաև աշխատանքում տղամարդկանց և կանանց միջև անհավասարության տեսանկյունից։ Արձանագրվել է, որ Թուրքիայում կանայք ավելի հաճախ են ստիպված լինում արտաժամյա աշխատել, քան տղամարդիկ։

Իսկ աշխատանքից ազատ ժամերի տեսանկյունից կանանց և տղամարդկանց միջև անհավասարության առումով Թուրքիան 40 երկրների շարքում 35-րդն է։ Թուրքիայում յուրաքանչյուր աշխատող օրական միջինում ունի աշխատանքից ազատ 14․8 ժամ, որը կարող է տնօրինել ըստ իր ցանկության։ OECD-ում այս ցուցանիշը միջինում 15 ժամ է։

OECD-ի զեկույցում առաջին հորիզոնականը զբաղեցրել է Հոլանդիան, երկրորդը՝ Իտալիան, երրորդը՝ Դանիան։ Ցանկի վերջին հորիզոնականներում հայտնվել են Կոլումբիան և Մեքսիկան։

Աղբյուր` haber.sol.org.tr