Թուրքիայի ՆԳ նախարար. «Թուրքիայի ամենաշխույժ հրապարակներն դատարկվել են»

Հասարակական11:40, 30 Մարտ 2020

Թուրքիայի ՆԳ նախարար. «Թուրքիայի ամենաշխույժ հրապարակներն դատարկվել են»

Թուրքիայի ներքին գործերի նախարար Սուլեյման Սոյլուն անդրադարձել է կորոնավիրուսի տարածման դեմ պայքարով պայմանավորված երկրում պարետային ժամ հայտարարելու մասին խոսակցություններին: Սոյլուն նշել է, որ այս պահին երկրում գրեթե բոլորը մեկուսացված են տներում:

«Միայն 2-3 տոկոսն է տնից դուրս գալիս՝ արտադրության սեկտորը, առաքման ծառայությունները, անվտանգության ու առողջապահական համակարգերը չհաշված։ Այս պահի դրությամբ ապահովել ենք սոցիալական մեկուսացումը»։

Նախարարը հիշեցրել է, որ փողոց դուրս գալու արգելքը գործում է միայն 65 տարեկանից բարձր և քրոնիկ հիվանդություններ ունեցող քաղաքացիների դեպքում:

«Այսօր Թուրքիայի պողոտաներն ու փողոցները տեսել եք: Հեռուստացույցով առավոտվանից ցուցադրում են: Թուրքիայի ամենաաշխույժ հրապարակները ամբողջովին դատարկ են: Ստամբուլում, Անկարայում, Իզմիրում, Անթալիայում դրանք ամբողջովին դատարկվել են»,- նշել է Սոյլուն՝ տեղեկացնելով քաղաքների մուտքերի, անձնական մեքենաների հասարակական տրանսպորտի տեղաշարժի հսկողության ու մի շարք այլ սահմանափակումների մասին:

Նշենք, որ վերջին տվյալների համաձայն՝ Թուրքիայում արձանագրվել է կորոնավիրուսով վարակման 9․217 և մահվան 131 դեպք:

Աղբյուր` Sözcü