Խոշոր երկրաշարժ Թուրքիայում. կա զոհ

Հասարակական11:39, 03 Հունիս 2025

Խոշոր երկրաշարժ Թուրքիայում. կա զոհ

Թուրքիայի արտակարգ իրավիճակների և աղետների կառավարման վարչության (AFAD) ինտերնետային կայքում տեղ գտած տեղեկատվության՝ Միջերկրական ծովի կենտրոնում հունիսի 3-ին՝ ժամը 02:17-ին արձանագրվել է 5.8 մագնիտուդով ցնցում։

Երկրաշարժը տեղի է ունեցել Մուղլայի նահանգի Մարմարիս շրջանում գտնվող վայրից 10.43 կիլոմետր հեռավորության վրա և 67.91 կիլոմետր խորությամբ։

Ցնցումները խուճապ են առաջացրել բնակչության մոտ:

Մուղլայի նահանգապետ Իդրիս Աքբըյըքը հայտնել է, որ երկրաշարժից հետո փրկարար խմբերը սկսել են աշխատանքներ իրականացնել տարածքում։

«Երկրաշարժից այս պահի դրությամբ տուժել է 69 քաղաքացի։ Նրանցից 10-ը տեղափոխվել են հիվանդանոց շտապօգնության մեքենայով, իսկ 45-ը՝ ինքնուրույն։ Ընդհանուր առմամբ 55 մարդ դիմել է հիվանդանոց։ 14 քաղաքացի հրաժարվել է տեղափոխվել և բուժում ստացել տեղում։ 1 հիվանդ հոսպիտալացվել է։ 46 հիվանդի հետազոտություններն ու բուժումը շարունակվում են շտապօգնության բաժանմունքում։ 8 հիվանդ արդեն դուրս է գրվել։ Մեր Ֆեթհիյե շրջանում երկրաշարժի ժամանակ խուճապի մեջ ընկած 14-ամյա մի երեխա, չնայած ցուցաբերված օգնությանը, չի հաջողվել փրկել»,- նշել է թուրք նահանգապետը։

Աքբըյըքը հայտնել է նաև, որ երկրաշարժից հետո քաղաքում էլեկտրամատակարարման, ենթակառուցվածքի, բնական գազի մատակարարման, խմելու ջրի և կոյուղու համակարգերում բնակչության առօրյան խաթարող խնդիրներ չեն արձանագրվել։ Նա նաև հավելել է, որ բնակեցված շենքերում ավերածություններ չեն եղել։

Աղբյուր` trthaber